Бейсенбі күні Коста-Рикада болған күші 6,1 балдық зілзаладан үш адам қаза тауып, 200-ден астамы жарақат алды. Жергілікті құтқару қызметі өкілдерінің хабарлауынша, жер асты дүмпулері бүкіл елде, тіпті көршілес Никарагуада да сезілген. 42 елді мекенге зақым келген. Кейбір аудандарда электр желілері үзіліп, байланыс тоқтаған. Жер сілкінісінің кіндігі шамамен ел астанасы Сан-Хоседен солтүстік-батысқа қарай 35 шақырымда болған. Жергілікті тұрғындардың айтуынша, олар мұндай алапат зілзаланы 1980 жылдан бері бастан кешпеген. Ал, агенттіктің хабарлауынша, 2008 жылдың өзінде Коста-Рикада 4700-ден астам жер асты дүмпулері тіркеліп, оның 60-қа жуығын халық сезген.